Украінцы сарвалі правядзенне беларускага рок-фэсту

Арганізатары беларускага фестывалю Be Free, які праводзіцца ва Украіне, заявілі, што фэст не адбудзецца праз нежаданне гарадскіх уладаў Чарнігава. Папярэдне канцэрты планавалася правесці 21-22 жніўня, але згоды на іх так і не было атрымана. Арганізатары кажуць, што ў справу ўмяшаўся беларускі афіцыйны бок.

Дагэтуль фэст Be Free прайшоў тройчы ў розных гарадах Украіны – Луцку, Львове і тым жа Чарнігаве. З перашкодамі арганізатары сутыкаліся хіба з беларускага боку, калі ў 2007 годзе аўтобусы з гледачамі былі спыненыя міліцыянтамі пад Баранавічамі ды завернутыя назад у Мінск.
Цяпер беларускія арганізатары не могуць паразумецца з мясцовымі ўладамі ў Чарнігаве. Папярэдняя згода на правядзенне канцэртаў з удзелам беларускіх рок-выканаўцаў была атрымана, але паседжанне аргкамітэта з удзелам мясцовых чыноўнікаў было раптоўна адмененае, афіцыйны дазвол беларусы таксама ад іх не атрымалі. Арганізатары мяркуюць, што ў справу ўмяшаўся беларускі афіцыйны бок.

"З нефармальных крыніцаў мы даведаліся, што чарнігаўскія ўлады знаходзяцца ў кантакце з афіцыйным беларускім бокам, які настойліва раіць не дазваляць фэст. Такім чынам, лёс міжнароднага фэстывалю, які праводзіцца на ўкраінскай тэрыторыі, дэ-факта знаходзіцца ў руках беларускіх уладаў. Такое стаўленне да свабоднай, адкрытай для ўсіх групаў насельніцтва культурнай акцыі, скіраванай на паляпшэнне кантактаў паміж Беларуссю і Украінай, здзіўляе і выклікае абурэнне", - гаворыцца ў заяве беларускага аргкамітэта, куды ўваходзяць, між іншых, прадзюсар Віталь Супрановіч і лідэр гурта ULIS Вячаслаў Корань.

Арганізатары вымушаны былі паведаміць пра адмену фэсту 21-22 жніўня. Беларусы цяпер шукаюць іншых магчымасцяў для правядзення Be Free.