“Крама“ зьняла першы прафэсыйны кліп

Tuzin.fm
11 июля 2014, 11:21
Гурт "Крама" прадстаўляе на Tuzin.fm кліп на песьню "Дзяўчынка". Музыкі называюць яго першым сур’ёзным кліпам за ўсю гісторыю існаваньня каманды.

Да здымкаў кліпа на адну зь песень з свайго новага альбому гурт "Крама" падыйшоў адказна. Дагэтуль было некалькі ролікаў, але ўсе яны, як зазначае гітарыст Сяргей Трухановіч, былі зьняты на хуткую руку і ніводзін зь іх "крамаўцаў" не задавальняў. Новае відэа даверылі здымаць маладому рэжысэру Андрэю Ляўковічу. У яго даробку 3D-кліп для амэрыканскага гурта Icodora Crane, а перамога на фэсьце мабільнага кіно Smartfilm. Андрэю было прапанавана на выбар дзьве песьні – "Дзякуй Богу мы ідзем дамоў" і "Дзяўчынка з шклянымі вачыма".

"Я абраў "Дзяўчынку" без ваганьняў, бо яна больш мэлядычныя і добра падыходзіць для візуалізацыі, – кажа рэжысэр у камэнтары для Tuzin.fm, – Паколькі гэтая песня зьвязана з асабістымі перажываньнямі, то я пастараўся стварыць атмасфэрны кінаматаграфічны эмацыйны відэакліп".

Матэлыял для відэа здымалі ў два дні. "Мы падыйшлі грунтоўна, як ніколі: узялі ў арэнду на ноч Тэатар беларускай драматургіі, паставілі сьвятло і гук і здымалі да раніцы. Сюжэтную лінію зь дзяўчынай Андрэй здымаў ужо бяз нас на вуліцах Менску", ­– апавядае гітарыст "Крамы" Сяргей Трухановіч.

Працай над "Дзяўчынкай" музыкі засталіся задаволеныя. Цалкам магчыма, што ў будучыні Андрэя Ляўковіча запросяць яшчэ раз. "Я буду рады зрабіць нешта яшчэ для гэтай каманды, якая ўвасабляе для мяне ўсю хвалю беларускага року", – кажа рэжысэр.

Песьня "Дзяўчынка" увойдзе ў новы альбом "Крамы" пад назваю "Белая вада", праца над якім практычна завершаная. Лідэр "Крамы" Ігар Варашкевіч з задавальненьнем апавядае пра будучы рэліз: "Альбом абяцае быць вельмі моцным і сур’ёзным, бо ён ужо прайшоў праверку часам. Аніводнай прахадной песьні ў ім ня будзе. Як ня дзіўна, у дыск увойдзе нямала лірычных твораў. Ён пачаў стварацца ў няпросты час (пасьля сьнежня 2010 году ­– ТГ), але песьні будуць не пра гэта. Як у "Океана Ельзи", якія сьпяваюць пра каханьне, але зьяўляюцца пры гэтым сымбалем свабоды ва Ўкраіне. Жартую, канечне, але мушу сказаць дакладна: альбом будзе добры!".

Рэліз альбому гурта "Крама" – "Белая вада" заплянаваны на восень.

Відэапрэм’ера на Tuzin.fm. Крама – Дзяўчынка (музыка гурта, словы Зьмітра Лукашука).

Рэжысэр: Андрэй Ляўковіч

Апэратары: Андрэй Ляўковіч, Вадзім Пацееў

Акторка: Валерыя Лютарэвіч
Заметили ошибку? Пожалуйста, выделите её и нажмите Ctrl+Enter
Дорогие читатели, не имея ресурсов на модерацию и учитывая нюансы белорусского законодательства, мы решили отключить комментарии. Но присоединяйтесь к обсуждениям в наших сообществах в соцсетях! Мы есть на Facebook, «ВКонтакте», Twitter и Одноклассники

Новости других СМИ