У Мінску пройдзе вечар памяці расстраляных у Катыні

У Мінску пройдзе вечар памяці расстраляных у Катыні афіцэраў польскай арміі. 70 год таму савецкія карныя органы знішчылі больш за 20 000 чалавек, што былі захопленыя ў палон пасля падпісання "пакта Молатава-Рыбентропа". Гісторыкі прызначылі імпрэзу на 7-га красавіка, калі ў Катыні Пуцін павінны перадаць Туску "беларускі спіс".

Міжнароднае таварыства "Мемарыял", беларуская асацыяцыя ахвяраў рэпрэсій і рух "Разам" прымеркавалі імпрэзу не толькі да сумнай даты, але і да важнай падзеі. Чакаецца, што менавіта 7 красавіка расійскі прэм’ер Уладзімір Пуцін уручыць у Катыні польскаму калегу Дональду Туску так званы "беларускі спіс" – спіс з 3800 палякаў, расстраляных у Заходняй Беларусі ў 1940 годзе.

"Яшчэ да канца не ясна, ці сапраўды Пуцін абнародуе гэты спіс, але вечар памяці мы ўсё ж запланавалі на гэты дзень", - кажа адзін з ініцыятараў правядзення вечарыны гісторык Ігар Кузняцоў. Ён таксама плануе зачытаць на вечарыне спіс з першых ста ўраджэнцаў Беларусі, расстраляных у Катыні. Падчас імпрэзы, што пачнецца на сядзібе партыі БНФ у 16.00, будзе паказаны дакументальны фільм і фрагмент з мастацкай стужкі Анджэя Вайды на тэму расстрэлаў.