Актывісты БХД хацелі падзякаваць маці Лукашэнкі?

Актывісты маладзёвай фракцыі "Беларускай Хрысьціянскай Дэмакратыі" Любоў Каменева, Ірына Губская і Зміцер Тамковіч былі затрыманыя супрацоўнікамі службы бяспекі прэзідэнта, а потым перададзеныя нараду міліцыі. Маладыя хрысьціянскія дэмакраты хацелі нагадаць мінчанам пра тое, што сёння адзначаецца Міжнародны дзень абароны дзяцей, і прыцягнуць увагу да праблемы абортаў у Беларусі.

Любоў Каменева, Ірына Губская і Зміцер Тамковіч збіраліся вывесіць расцяжку з надпісам "Дзякуй Богу! Твая маці не зрабіла аборт..." над праспектам Пераможцаў. Зазначым, што тут праходзіць штодзённы шлях на працоўнае месца прэзідэнта Аляксандра Лукашэнкі.

- Актывісты БХД нават не паспелі разгарнуць расцяжку, як да іх падыйшлі людзі ў цывільным. Хутчэй за ўсё, гэта былі супрацоўнікі службы бяспекі прэзідэнта, - распавёў прэсавай службе "Беларускай Хрысьціянскай Дэмакратыі" прадстаўнік БХД Дзяніс Кобрусеў. – Потым яны былі перададзеныя нараду міліцыі, які павёз іх у Цэнтральны РАУС.

Нагадем, што цягам тыдня – з 1-га па 7 чэрвеня – больш чым у 40 гарадах краіны пройдуць разнастайныя мерапрыемствы ў межах кампаніі "Моцная сям’я – моцная Беларусь", якую партыя "Беларуская Хрысьціянская Дэмакратыя" распачала ў студзені гэтага года.