У Магілёве моладзь БСДП правяла круглы стол, які быў прысвечаны Дню Волі

25 сакавіка ў Магілёве адбыўся круглы стол на тэму “Роля Беларускай Народнай Рэспублікі і Беларускай Сацыялістычнай Грамады ў фармаванні беларускай дзяржаўнасці. Сучасны погляд”. Арганізатарам круглага стала выступіў аргкамітэт сябраў Беларускай сацыял-дэмакратычнай партыі (Грамады) г. Магілёва.

У працы круглага стала ўзялі ўдзел каля 20 чалавек, пераважна сябры БСДП і прафсаюза радэёэлектроннай прамысловасці.
Падчас круглага стала былі заслуханы два даклады на тэмы: "БСГ і Антон Луцкевіч і БНР. Невядомыя старонкі гісторыі". Дакладчыкамі па гэтых тэмах выступілі старшыня камісіі па асноўных каштоўнасцях БСДП Ігар Барысаў і студэнт гістарычнага факультэта Магілёўскага дзяржаўнага ўніверсітэта Станіслаў Кавалеўскі.

У сваім дакладзе Станіслаў Кавалеўскі прывёў шэраг малавядомых фактаў аб дзейнасці ўраду БНР і яго дасягненнях. Ігар Барысаў, робячы даклад, акцэнтаваў сваю ўвагу на асобе ідэйнага правадыра БСГ Антона Луцкевіча, прыводзіў факты з ягонай біяграфіі, агучваў дагэтуль малавядомыя праекты, распрацаваныя гэтым таленавітым грамадскім і палітычным дзеячам.

Абмяркоўваючы даклады, удзельнікі круглага стала праводзілі паралелі з сучаснасцю. Яны адзначалі, што ідэал палітычнага і сацыяльнага ладу, заяўлены ва ўстаноўчых дакументах Беларускай Народнай Рэспублікі, у сучаснай Беларусі не дасягнуты.

Наступнае, што плануюць правесці актывісты БСДП (Грамады) ў Магілёве, – гэта адсвяткаваць 1 траўня ў сацыял-дэмакратычных традыцыях.