Занусі гатовы адкрыць гатэль для беларускіх студэнтаў

Класік еўрапейскага кіно падчас свайго візіту да студэнтаў беларускага універсітэта культуры заявіў, што гатовы прыняць іх у сваёй варшаўскай сядзібе і нават даў нумар тэлефона.

"Я сам вандраваў па свеце практычна без грошай, калі быў студэнтам, - сказаў Занусі. – Таму лічу сваім доўгам прымаць маладых людзей з розных краінаў свету. Запрашаю да сябе і беларусаў".

Польскі режысёр падкрэсліў, што гэта зусім не жарт. "У маім варшаўскім доме могуць размясціцца да дваццаці чалавек, і шмат хто карыстаецца такой магчымасцю". Ён нават распавёў некалькі камічных прыкладаў, звязаных з прыездам студэнтаў.

Аднойчы Занусі пакінуў расійскім студэнтам, якія завіталі да яго, уласнае аўто і дакументы на яго, каб тыя здолелі самастойна дабрацца да здымачнай пляцоўкі, дзе ён працаваў. "Якое ж было маё здзіўленне, калі мне патэлефанавалі з паліцыі і сказалі, што затрымалі рабаўнікоў, якія завалодалі маёй машынай. Я перажываў, але студэнты мне толькі падзякавалі за цікавую прыгоду".

Каб пацвердзіць сур’ёзнасць сваіх намераў, Занусі даў нумар тэлефона, па якім можна паведаміць пра свае намеры прыехаць да яго ў госці. А таксама здзівіў прысутных на яго майстар-класе просьбай зрабіць калектыўны здымак для яго. "Гэта на той выпадак, калі нехта з вас стане сусветнай знакамітасцю. Тады я яго вылучу на здымку і буду ганарыцца", - сказаў режысёр. І ён сапраўды не жартаваў, таму што такі выпадак некалі ў адной з еўрапейскіх краінаў ужо здараўся.

Хто са студэнтаў-слухачоў майстар-класа Кшыштафа Занусі стаў сусветна вядомым режысёрам?

Сайт UDF.by гатовы прадаставіць той самы нумар тэлефона таму, хто адкажа на гэтае пытанне. А ў дадатак мы яшчэ і падорым пераможцу тры кампакт-дыскі з фільмамі славутага рэжысёра. Хочаш стаць удзельнікам конкурса? Лістуй сюды: [email protected]