“Свята беларускай мовы“ зменшылі ў маштабе і панізілі ў статусе

Адміністрацыя ДК МТЗ адмовіла арганізатарам у правядзенні імпрэзы "Свята беларускай мовы", запланаванай на 24 лютага. Вечарына анансавалася, як самае маштабнае адзначэнне дня роднай мовы, а ў якасці гасцей туды былі запрошаныя такія асобы, як Уладзімір Арлоў і Лявон Вольскі. Мерапрыемства абяцаў наведаць і міністр культуры Павел Латушка.

У дзень правядзення "Свята беларускай мовы" арганізатару Кірылу Шыку патэлефанавалі з адміністрацыі Палаца культуры і паведамілі, што правядзенне імпрэзы немагчыма. Без тлумачэння прычынаў.

Прададзеныя глядачам квіткі давядзецца вярнуць, а сама імпрэза ў скарочаным выглядзе адбудзецца ў закрытым фармаце ва Універсітэце культуры. Справа ў тым, што "Свята беларускай мовы" – выпускная праца Кірыла Шыка, які сканчае режысёрскае аддзяленне гэтага універсітэта. Таму кіраўніцтва навучальнай установы выдзеліла для яе сваё памяшканне. Праўда, правесці яе афіцыйна і маштабна не атрымалася.

Адзін з ініцыятараў правядзення "Свята беларускай мовы" - кампанія "Будзьма беларусамі" выступіла з заявай, дзе адмовілася ад удзелу ў гэтым мерапрыемстве.