«Ляпіс Трубяцкой» запісаў песню на далікатную тэму

Гурт выклаў у інтэрнет песню пад назвай "Я верю" з новага альбома "Веселые картинки". Як кажа Сяргей Міхалок, яму захацелася зрабіць твор на тэму, пра якую людзі кажуць з неахвотай. "Я веру ў Ісуса Хрыста, я веру ў Гаўтаму Буду, я веру ў прарока Мухамада…" - пяецца ў ёй.

Акрамя таго ў "Я верю" згадваецца Крышна, Тор, Джа і яшчэ цэлы шэраг багоў розных эпох і кантынентаў.

"Рэлігійная тэма лічыцца у нас досыць далікатнай. Усё, што яе тычыцца, альбо абрастае патрыярхальным пафасам, альбо людзі пра гэта ўвогуле імкнуцца не казаць: аднекваюцца, аджартоўваюцца, хіхікаюць...Таму я і вырашыў выкласці сваё ўяўленне пра сусветны ўклад у фармаце троххвіліннай песні", - кажа Сяргей Міхалок. На думку музыканта, не варта знаходзіць заганы ў веры іншых людзей, будаваць адносіны на аснове гвалту і непрыняцця іншай пазіцыі. "Але толькі не ўспрымайце мяне, як прапаведніка. Я найперш музыкант гурта "Ляпіс Трубяцкой", таму дазваляю сабе трошкі іроніі", - папярэджвае Сяргей.

Гэта ўжо другая песня, выкладзеная ў інтэрнэт з новага альбому "Ляпісаў", рэліз якога чакаецца ў сакавіку. Першы інтэрнэт-сінгл "Грай" быў прадстаўлены пры канцы мінулага году.