Лідэру беларускай рок-гурта пагражае да 13 год турмы

Лідэр гурта "Голая манашка" Фёдар Жывалеўскі цяпер знаходзіцца ў следчым ізалятары ў Жодзіна ў чаканні суда. Рокера вінавацяць па двух артыкулах Крымінальнага кодэкса, датычных незаконнага абароту наркотыкаў і арганізацыі прытону для спажывання наркотыкаў. Яму пагражае да 13 год турмы.


Знаёмыя Фёдара Жывалеўскага кажуць, што музыканта затрымалі на лесвічнай пляцоўцы, калі той выкідаў смецце. У яго кватэры знайшлі наркатычныя рэчывы і адразу даставілі музыканта ў пастарунак. Цяпер Фёдар знаходзіцца ў следчым ізалятары Жодзіна ў чаканні суду. Яму інкрымінуюць два артыкулы Крымінальнага кодэксу – "Незаконны абарот наркатычных рэчываў" і "Арганізацыя прытону для спажывання наркатычных сродкаў, псіхатропных рэчываў ды іх прэкурсораў". Да іх ліку адносяць гераін, амфетамін ды опій. Жывалеўскаму пагражае ад васьмі да трынаццаці год турмы.


Адміністратар гурта "Голая манашка" Зміцер Шаўцоў кажа, што пакуль дата суда не прызначана. "Фёдар прызнае сваю віну, але толькі ў частцы 1 арт.328 – незаконны выраб наркотыкаў без мэты продажу. Па гэтым артыкуле пагражае пазбаўленне волі да пяці год. У апошнім сваім лісце ён піша, што ў некаторых момантах былі парушаныя яго правы, але не ведае, як гэта даказаць, бо не можа дазволіць сябе нармальнага адваката", - кажа Зміцер.

На лідэра "Голай манашкі" не першы раз заводзяць крымінальную справу. Яго судзілі за крадзёж, падробку дакументаў і пабег з месца абмежавання волі. Летась ён ужо адбыў пакаранне ў паўтары гады турмы. Раней яго затрымлівалі і за наркотыкі, але тады музыкант пазбег пакарання, трапіўшы на лячэнне.

усе фота з афіцыйнага сайта гурта

Сёлета Фёдар Жывалеўскі з сваім гуртом запісаў альбом пад працоўнай назвай "Алілуйя". Яго прэзентацыя цяпер адкладаецца.


Паслухаць песьню "Голай манашкі".